historia dil club da tennis Trun

Igl onn 1976 han amitgas ed amitgs dil tennis fundau il Club da

tennis Trun. Per saver baghegiar 2 plazs da tennis ed ina tegietta,

han las commembras ed ils commembers prestau ver 1600 uras

lavur cumina. La lavur ei sepagada. Mo dus onns suenter la

fundaziun veva il club varga 100 commembers. Igl onn 1979 ei il

club staus representaus per l’emprema gada cun in’equipa al

campiunadi d’interclub.

Cul temps ei l’idea naschida da baghegiar ina nova casa dil club. Igl

onn 1995 decidan ils commembers da princip da construir il tierz

plaz. 5 onns pli tard decida la radunonza da cumprar il magasin dil

militar el vest dils plazs. Tochen ch’il magasin ha saviu vegnir

trasformaus en ina casa dil club, eis ei denton iu in pulit temps. A

caschun d’ina radunonza extraordinaria il 2004, decidan ils

commembers unanimamein da construir il tierz plaz ed ina nova casa

dil club. Grazia allas commembras ed ils commembers che han

prestau fetg bia lavur cumina, ha il club saviu organisar ina fiasta

d’avertura la fin d’uost 2005.

Ils davos onns ha nies club era saviu festivar bia buns resultats. Las

equipas han adina puspei contonschiu la runda da promoziun dil

campiunadi d’interclub. Surtut las giuvnas han fatg furora al

campiunadi da junioras e contonschiu pliras gadas il final a

Winterthur. Il 2011 ei il Club da tennis Trun staus representaus ella

ligia naziunala C ella categoria dallas damas activas. Quei sco

emprem club insumma ella Surselva.